Meghalaya : World Creativity and Innovation Day hmang

Meghalaya-a kutkawih eizawnna (entrepreneurship) leh digital support system thuam chakna atan World Creativity and Innovation Day hman niin, he hunah hian platform thar, fund sem chhuah tur leh ṭhalaite hmalakna phochhuah a ni.

Programme hi 'PRIME IGNITE 2026' tih niin, entrepreneur, official leh zirlaite Lok Bhavan-ah an kalkhawm a, sumdawnna huang zauh dan tur leh state puma startup puihbawmna tur sawi ho a ni. He hunah hian digital paltform pathum tlangzarh niin, chungte chu enterprise tihchakna tur centralised service provider system, pianphunga rualbanlo kutthemthiamte puihna tur e-commerce platform leh local delivery application an ni a, Upper Shillong-a online service buatsaih hmasak ber a ni bawk. Official-te chuan platform tlangzarhte chu sumdawnna tenau enkawltuten an chhawr ṭangkai dawn tih an sawi.

He huna data an tihchhuahah,CM ELEVATE programme hnuaiah entrepreneur 2,847 an awm tawh a, sum lama ṭanpuina mi 885 chuangin an dawng tawh bawk. Thuneitute chuan PRIME hmalakna hnuaiah startup 1,350 an awm tawh tih tarlangin, state-a enterprise network huang zauh zel a ni, an ti. He huna thu a sawiah, Ampareen Lyngdoh chuan hmalakna tam tak chu mipuite ngaihtuah chhuah a nih thu leh, sorkarin theihtawpin puihbawmna a pe tih a sawi bawk.

Official-te chuan hun rei tak daih hmasawnna vawng nung turin ṭhalai entrepreneur-te an chah. State puma student ambassador intihsiaknaa champion-te chu pawisa leh certificate hlan an ni bawk. College of Community Science leh Jaintia Eastern College team-te chu pakhatna an ni.