Tripura : TTAADC inthlan zawha buaina chhuak uluk zawkin chhui dawn

Tripura Tribal Areas Autonomous District Council (TTAADC) inthlan result puan zawha buaina chhuak chu state sorkar chuan Tripura Recovery of Damages to Public and Private Property Act, 2021 hmangin uluk zawka chhui leh a nih tur thu leh, bungrua tihchhiatte laka zangnadawmna pekna kalpui tur pawh khauh taka kenkawh a nih tur thu a sawi.

Official-te chuan buaina chhuakah hian mi 200 chuangin an chenna in an chhuahsan tih an sawi a; chenna in, lirthei, dawr leh vantlang leh mimal bungruate chu hmun eng emaw zatah tihchhiat a nih thu an sawi. Police official pakhat a hming tarlan loh chuan he dan hi April 2021-a siam a nih thu sawiin, buaina, nawrh huaihawt, bandh leh tharum thawhna dangte avanga chhiatna thleng state sorkarin a puihna tur a nih thu a sawi. Mahse thuneitute chuan he dan hi tun thlengin mumal taka kalpui a la ni lo tih an sawi.

Tripura Recovery of Damages to Public and Private Property Act, 2021 hnuaiah hian buaina chhuakin harsatna leh chhiatna a thlen puihbawmna pekna tur Claims Tribunal din tura tih a ni. Additional District Magistrate-te chu he thil buaipui tur hian state sorkarin a ruat a, buaina chhuakin chhiatna a thlente chu kimchang takin police-ten Claims Tribunal-ah thla thum chhungin an theh lut tur a ni. Tribunal chu pawikhawitute man chhuah leh compensation pe tura hma la tura tih an ni. Chief minister Manik Saha chuan tun hnai khan buaina chhuakin chhungkua a nghawngte tlawhin, Chief Minister's Relief Fund aṭangin Rs nuai 64.5 a lo sanction tawh bawk.