Nagaland : DBT STAR College Scheme hnuaiah Kohima Science College thlang

Nagaland-a Kohima Science College chu Department of Biotechnology STAR College Scheme hnuaiah thlan niin, Nagaland-a sorkar college zingah he programme-a tel hmasa ber a ni.

College hian March 2025 khan an proposal hi an theh lut a, scheme hnuaia ram puma institution 34 zingah thlan chhuah zingah an tel a ni. Coordinator Dr Vethselo Doulo chuan, committee member Along Longchari nen kumin March 10 khan New Delhi-a DBT headquarters-ah final proposal hnuhnung ber an theh lut a ni. Kumtin he scheme hnuaiah hian college 10 aṭanga 15 thlan chhuah ṭhin a ni.

Scheme hnuaiah hian college-a department- Botany, Chemistry, Geography, Geology, Mathematics, Physics, Statistics leh Zoology-te chuan Department of Biotechnology, Ministry of Science and Technology aṭangin puihbawmna sum an dawng dawn a ni. Fund an dawn hi laboratory infrastructure, scientific equipment thuam chakna atan hman a ni ang. Hei bakah undergraduate zirlai, faculty member leh mipui tan workshop, seminar leh training programme buatsaih a ni bawk ang. Scheme hian interdisciplinary learning a tihhmasawn dawn bakah, practical-a thiamna a tihpun beisei a ni.

College chuan he hun pawimawh tihhlawhtlin kawnga stakeholder-te inpeknaah lawmthu a sawi. Nagaland-a science education-a thil thar hmuh chhuah leh zirna tihhmasawn tum a nih thu an sawi bawk.