Assam police lakah Complaint thehlut

Assam khawpui, Guwahati-a December 13-a Citizenship (Amendment) Act duh lohna lantir ṭuma police-te silai hmehpuahah Deepanjal Das (23) leh Sam Stafford (17) te an thi nia sawi a nih avangin, Assam police department lakah complaint thehluh a ni. 

North East Human Rights Organisation (NEHRO) secretary of state affairs Buteng Tayeng chuan Assam Human Rights Commission hnenah complaint hi a thehlut. Complaint a thehluhah, Tayeng chuan police-te hian warning pawh pe lawk loin silai hi an hmetpuak niin a sawi. Das hi a dulah kah fuh niin Gauhati Medical College and Hospital panpui a nih hnuin a thi a, Stafford hi Hatigaon-a nawrh an huaihawtnaa silai hian fuhin damdawi-inah a thi bawk a ni. 

Assam police-te chuan nawrh huaihawtnaa tharum thawhna thleng vangin mi 1,460 an hreng a, mahse a hnuah mi 190 tih loh chu chhuah leh nghal a ni. Kar liam ta khan Assam-a CAA duh lohna lantirnaa buaina chhuakah hian mi paruk an thi a ni. 

CAA duh lohna lantira nawrh huaihawt vanga December 12-a man, Krishak Mukti Sangram Samiti (KMSS) leader Akhil Gogoi chu National Investigation Agency (NIA) chuan Delhi-ah an hruai thla a, thu an zawtfiah mek nia sawi a ni. 

Hetih lai hian Gogoi-a chhung­te chuan Gogoi hi a hrisel­na a ṭha lo hle a, NIA hian an enkawl ṭhat viau a ngai tih an sawi. Gogoi hi Unlawful Acti­vities (Prevention) Act hnuaiah thubuai siamsak a ni a, December 17 khan Guwahati-a special NIA court chuan ni 10 chhung NIA kuta awm turin a ti a ni. 

Assam police-te chuan CAA dodalna lantira nawrh huai­hawtnaa tharum thawhna chawk chhuaka puhin Islamic orga­nization Popular Front of India (PFI) state president Aminul Haque leh press secretary Md Muzammil Haq an man a, IPC section hrang hrang hnuaiah thubuai an siamsak nghal a ni. 

Industry minister Chandra Mohan Patowary chuan Youth Congress hruaitu pahnih pawh man tuma zawn mek an ni tih a sawi.