Manipur : Left Party-ten CAA duh lohna lantirin nawrh huaihawt

Left Party-ten nimina rampum huapa Citizenship (Amendment) Act, 2019 duh lohna lantira nawrh an huaihawt chu Manipur-a Left party-te pawhin zawmin, zing dar 6 aṭanga tlai dar 6 thlengin state chhungah nawrh huaihawt a ni. 

Left party hruaitute chuan an nawrh huaihawt hi political party dang leh civil society organisation hrang hrangten an thlawp thu an sawi. CPI, CPI(M), RSP leh Forward Bloc te chuan a hmain CAA dodalna lantirna chu an thlawp tur thu an lo sawi tawh a ni. 

CPI Manipur State Council secretary L Sontikumar chuan CAA chu mipuite tana ṭha lo a ni tih sawiin, Left party chuan he dan hi sut leh turin an duh tih a sawi. Sontikumar chuan political party, civil society organisation, voluntary organisation leh hmeichhe pawl hrang hrangte pawhin an thurin in ang lo hrang hrangte dah ṭhain, India ram tana ṭha lo he dan duh lohna an lantir chu an thlawp a ni, a ti.