January 1, 2020 aṭangin Manipur-ah ILP system kalpui ṭan a ni dawn
Manipur chief minister N Biren Singh chuan January 1, 2020 aṭangin Manipur-ah Inner Line Permit (ILP) system chu kalpui ṭan a ni dawn tih Assembly session-ah a sawi.
Nilaini aṭang khan ni thum awh tur, 11th Manipur Legislative Assembly session vawi kua-na neih a ni. CM hian House-ah Manipur Goods and Services Tax (Second Amendment) Bill, 2019 a pharh nghal bawk. Eptu member Kh. Joykisan Singh leh R.K Imo Singh-ten ILP chungchang an zawhna chhangin, CM chuan ILP system hmanna tura Rules and Regulation te buaipui mek a nih thu leh, zawhfel a nih thuai tur thu a sawi.
ILP system hman a nih hnuah an state-a lut turte tana entry form lakchhuahna tur chu Deputy Commissioner leh entry point-ah te hawn a ni dawn tih a sawi. Online hmanga form lak theih dan pawh buaipui mek a ni tiin, hei hi peihfel a nih chuan state pawn lam aṭanga luh turte pawh awlsam takin ILP hi a dil theih dawn a ni, a ti. ILP neiloa lutte hremna pek dan chu, he system hmang mek state dangte tihdan an zirchianna aṭangin, Rules and Regulations-ah telh a ni dawn bawk tih a sawi a ni.
Sorkar laipuiin Manipur-a ILP system hman a remtihsak ta chu lawmawm a tih thu sawiin, CM chuan hei hi state chhung mipui, pawl leh political party hrang hrangte theihtawp an chhuah vang a ni, a ti.