Arunachal : CM Khandu-a'n Defence Minister Singh a hmu

Arunachal Pradesh chief minister Pema Khandu chuan Pathianni khan New Delhi-ah defence minister Rajnath Singh a hmu a, Arunachal infrastructure pawimawh, a bikin border district-ahte thuam chakna tura sorkar laipui thlawpna leh puihna a dil.

State mipui aiawha lawmthu hrilhin, CM Khandu chuan an state-a border district-a tun hnai kum eng emaw chen aṭangin infrastructure lama hmasawnna tam tak hmuh tur a awm thu a sawi. Ramri hrula infrastructure thuam chak chuan security lam a tihchak bakah, a mi chengte khawsak phung pawh a chawikan phah hle a ni, a ti.

Khandu leh Singh hian Arunachal Pradesh state mamawh hrang hrangte, a bikin inkalpawhna lam chungchangte an sawi dun a ni. Akajan-Likabali-Bame corridor, Taro Tamak lui chunga lei pawimawh tak awm telna pawh a hun taka zawhfel a pawimawh thu an sawi. He kawng hi Assam phaizawl leh AP-a Upper Subansiri leh Shi-Yomi district inkalpawhna pawimawh tak a ni. A siam hna hi BRO in an thawk mek a ni.

Defence Minister chuan Arunachal tana rawtna leh project thlente chu sorkar laipui chuan a ngaihtuahsak dawn tih Khandu chu a lo hrilh. Meeting zawh hnuah Khandu chuan Rajnath Singh-a'n an state-a border infrastructure tihhmasawnna tura a thlawpna avanga an lawmthu social media-ah a tarlang.