Tripura : ADC member-te la lut, eptuten an boycott

Tripura Tribal Areas Autonomous District Council (ADC) member thlan thar, Tipra Motha party member 24 te chu Thawhṭanni khan Khumulwng-a council headquarters-ah law secretary, Shankari Das chuan rinawmna thu tiam tirin a la lut. ADC member tharte lak luh inkhawm hi eptu party - BP, CPM Leh Congess chuan a boycott thung.

ADC inthlan neih zawh takah Tipra Motha Party chuan seat 28 awmah seat 24 an la a ni. Tipra Motha hi state sorkarah BJP nen thawk dun mah se, district council inthlanah erawh party malin a ding thung. BJP chuan seat 4 a la ve bawk a, mahse, member palite hian rinawmna thu an tiam ve lo. Eptute hian eirukna leh inrelbawlna dik tawk lo vang leh, inthlan zawhah Motha thlawptute lamin tharum thawhna an thlen nia sawiin ADC member thar lak luh hi an boycott a ni. Inthlan vuakvetah thil dik tawk lo tih a awm nia sawiin, BJP chuan Governor hnenah complaint an lo theh lut tawh bawk.

Tipra Motha dintu, Pradyot Kishore Debbarma chuan lak luh inkhawma thu a sawiah, inrelbawlna ṭha a awm theihna tura insiamṭhat a ngaih thu a sawi. Hetih lai hian eptu lamin eirukna awm nia an puh chungchang erawh a sawilang lo thung. Tihdan phungah chuan ADC member thlan tharte hian Chairman leh chief executive member (CEM) an thlang nghal ṭhin a, mahse, tun ṭumah chuan West Bengal Assembly inthlan result puan hun an nghak phawt dawn tih Tipra Motha hruaitute chuan an sawi.

Pradyot Debbarma hian nimin khan Tripura governor, Indrasena Reddy Nallu a hmu a, Tripura Tribal Areas Autonomous District Council siamṭhatna tura ṭul leh pawimawh hrang hrangte an sawi dun. Governor hnenah district council thuam chak a ṭul thu leh, thil phurh hrang hrang tun thlenga tihkhawtlai la awm chungchangte a sawi thu a tarlang. Governor chu tribal council leh a huam chhunga mi chengte kaihhnawih thil harsatna hrang hrang awmah chinfel a nih theihna tura inrawlh turin a ngen bawk.