Manipur : COCOMI-in people's convention day buatsaih dawn

Manipur-a Coordinating Committee on Manipur Integrity (COCOMI) chuan, state-a hnam leh hnam inkara buaina a chhuah aṭanga kum thumna, May 3 hian people's convention an buatsaih dawn tih an puang.

Nimina press conference neihah, COCOMI convenor Y.K. Dhiren chuan May 3 chu state-a buaina a chhuah kum thumna a nih thu leh, programme an hman tur chu "Manipur People’s Convention on Manipur Crisis" tih a nih thu a sawi.

Dhiren chuan convention an buatsaih turah hian state-a hun rei tak buaina awm tawh tihtawp dan tur, hun lo awm zel tur atana hmalakna kalpui dan tur sawi ho a ni ang, a ti. District tinah convention chu buatsaih a nih dawn bakah, mithiam, local club, Meira Paibis leh civil society pawlte sawm an ni dawn tih a sawi bawk. Hei bakah hemi zan dar 7-ah tualchhung buaina avanga nunna chante hriatrengna atan candlelight vigil state pumah neih a ni bawk ang. Dhiren chuan April 25-a rally buatsaihnaa an pawlin ngenna pasarih a siamte sorkarin a chhan dan chu lungawi thlak loh an tih thu sawiin, sorkar lakah lungawi lohna an lantir chhunzawm zel dawn tih a sawi bawk.

State sorkar laka COCOMI-in an thil phut zingah narco-terrorism chungchanga hremna lekkawh, tun hnaia pawikhawihna thlenga rorelna dik kalpui, lungawi lohna lantirtute zinga nunna chante thih danah judicial inquiry neih, internally displaced persons (IDP) te relief camp aṭanga sawn chhuah, Suspension of Operation pact endik leh National Register of Citizens (NRC) kalpuite an tel.

State sorkarin inbiakna nei tura an sawmna chu May 3-a convention buatsaih tura mipui ngaihdan an lakkhawm hnuah an pawl hian thutlukna an siam dawn chauh tih Dhiren chuan a sawi bawk.