Nagaland: KU-in security force-te chetdan dem

Nagaland-a Konyak Union (KU) chuan April 26 zanlaia Mon district-a Namthai khuaa 20 Assam Rifles leh 166 Territorial Army ṭangkawpin Namthai village council chairman, Shaopa Konyak an man chu na takin an dem. Konyak chu pawisawi lo leh khawtlang hruaitu, mipui hamṭhatna leh remna leh muanna awm theihna tura mi inpe a nih thu an sawi.

KU chuan Konyak man a nih chungchangah hian intelligence-te chu finfiahna mumal an neih loh bakah, man theihna dan an nei lo tih an sawi. Union chuan state-a dan kengkawhtu agency-te chanvo leh an mawhphurhna sawilangin, Nagaland Police bakah Naginimora leh Mon district-a 42nd Assam Rifles-te pawhin he beihpui an thlak chungchangah thu belhchian dawl hriat an neih lo niin an sawi bawk.

Armed Forces (Special Powers) Act (AFSPA) hman chungchanga an ngaihdan pawh tarlangin, security force-ten thu mumal leh dan hnuai ni loa beihpui an thlakna chuan an laka mipui rinna a tihchhiat bakah, district-a venhimna an kalpui danah an hlawhchham tih an tarlang. Naginimora, Namthai, Tiru leh Tizit huam chhung bikah pawh mipuiten security force an ring zo tawh lo a ni, an ti. Hei bakah April 25-a security force-ten Mon district-a United Liberation Front of Asom (Independent) (ULFA-I) cadre pathum an man tih thuchhuah an siam pawh thudik lo a nih thu an tarlang.