Bodo Peace Accord ziak fel ta

Sorkar laipui, Assam sorkar leh Bodo helpawl, National Democratic Front of Boroland (NDFB) hnuaia pawl pali-te chuan nimin khan inremna an ziak fel ta. He inremna an ziahah hian All Bodo Students Union (ABSU) pawh an tel ve a ni. 

Union home minister Amit Shah chuan inrem­na an ziak thei ta chu lawmawm a tih thu sawi­in, he inremna hian Bodoland-ah boruak muanawm leh hmasawnna a thlen ngei dawn a ni, a ti. Nimina inremna an siam angin, NDFB mi leh sa 1550-te chu January 30 hian sorkar kutah an ralthuamte nen an inpe dawn a ni.  Bodoland Territorial Area District (BTAD) tih pawh Bodoland Territorial Region (BTR) tia thlak a ni ang. Bodoland area tihhmasawnna turin sorkar laipuiin special package, cheng vaibelchhe 900 a pe dawn a, Bodo ṭawng leh culture te pawh  humhalh sak a tiam bawk. 

Bodo Peace Accord-ah hian NDFB hnuaia pawl pali hotu, Ranjan Daimari, Govinda Basu­matary, Dhiren Boro leh B Saoraigra-ten hming an ziak a, ABSU president Pramod Boro leh Bodoland Territorial Council (BTC) chief Hagrama Mohilary te pawhin hming an ziak bawk. Assam sorkar aiawhin Assam chief secretary Kumar Sanjay Krishna chuan a hming ziakin, sorkar laipui aiawhin union home secretary AK Bhall chuan a hming a ziak bawk a ni. Nimina inremna an ziahnaah hian union home minister Amit Shah, Assam chief minister Sarbananda Sonowal leh senior minister Himanta Biswa Sarma ten an telpui a ni. 

Nimina Bodo Accord ziah hi kum 27 chhunga inremna an siam vawi thumna a ni. Bodo accord hmasa ber chu kum 1993 khan ABSU nen ziak niin, he inremna siam hmang hian Bodoland Autonomous Council din a ni. 

Kum 2003 kha Bodo accord pahnihna chu helpawl, Bodo Liberation Tigers (BLT) nen ziah a ni leh a, Assam-a district pali - Kokrajhar, Chirang, Baska leh Udalguri-ah Bodoland Territorial Council (BTC) dinin, Bodoland Territorial Area District (BTAD) tia vuah zui a ni.