Nagaland : Governor-in welfare scheme ennawn, fur atana inbuatsaihna a thlir let

Nagaland governor Nand Kishore Yadav chuan Lok Bhavan-a Social Welfare Department nen review meeting an neihah welfare scheme tihchangtlun a pawimawh thu sawiin, Health and Family Welfare Department nen thawh hona ṭha tak neia disability certificate pek chhuahna tur block- and village-level camp siam a rawt. He rawtna hian rualbanloten sorkar aṭanga hamṭhatna awlsam zawka an hmuh theihna tura puihna tur a ni.

Meeting-ah hian Ministry of Women and Child Development flagship scheme hnuaia Saksham Anganwadi & Poshan 2.0, Mission Vatsalya leh Mission Shakti-te ennawn a ni. Central ministry hnuaia kum upate leh rualbanlote tana hmalakna hrang hrang sawi ho a ni bawk a, Child Welfare Committee leh Juvenile Justice Board chuan naupang venhim kawnga hmalakna an neihte an tarlang. Governor chuan hmalakna kalpui mek a nih dan chu lawmawm a tih rualin, chak zawka kalpui turin department hrang hrang thawh hona ṭha neih a pawimawh thu a sawi.

Yadav chuan meeting dang a neihah state puma fur lo thleng tura inbuatsaihna a thlir let. He hunah hian Department hrang hrang chuan district-level-a inralrinna kalpuina tur ruahmanna an neihte an tarlang. Public Works Department chuan highway pawimawhte uluk taka vil reng an nih thu an sawi. Kohima district administration chuan task force din, lirthei tlan dan endik, medical lama inpeih, leh thil pawimawh supply dan tur an tarlang.

Governor chuan department zawng zawng chu fimkhur turin a hriattir a, a hun taka chhanchhuah hnathawh leh, ruahtui tlak tam laia harsatna a thlen lohna turin mipui hnenah khawchin hriattirna thehdarh ṭhin turin a chah.