Arunachal : NSCN(K) cadre pathum man

Arunachal Pradesh police leh Spear Corps hnuaia Assam Rifles ṭangkawp chuan NSCN-K (Nikki Sumi Faction) cadre pathum chu Tirap district-a Wancho Colony-ah an man.

Official-te chuan helpawl chetvelna a awm tih thu an dawn bawhzuiin beihpui thlak a ni tih an sawi. Security force-te chuan rang taka hma lain, cadre pathumten pawikhawihna an thlen hmain hlawhtling takin man an ni tih an tarlang. An mi mante hi hmarchhak bial hmun ṭhenkhata helpawl kaihhnawih thila inhnamhnawih, NSCN-K (Nikki Sumi) pawl nen inkungkaih nia rin a ni. Security agency-te chuan Tirap leh a chhehvel district-ah tunhma aṭang tawhin helpawl pawikhawihna a lo thlen fo tawh avangin uluk takin an thlithlai chhunzawm reng a ni.

An mi mante hi uluk zawka chhuizui an ni ang. Thuneitute chuan an nihna, network link leh dan loa sum inlaksaknaah an inhnamhnawih em tih leh helai biala pawikhawihnaah an tel leh tel loh an chhuizui dawn a ni. Assam Rifles official-te chuan he beihpui thlakna hian remna leh muanna bakah dan leh thupek vawnhim kawnga security force-te inpekna a lantir tih an sawi. Hmarchhak biala helpawl pawikhawihna thleng ṭhin tihtawpna atan central leh state force thawh hona ṭha neih a pawimawh tih an sawi bawk.