Assam-ah mobile internet service tinung ta BJP MLA rualten CM an hmu
Assam-a Citizenship (Amendment) Act, 2019 duh lohna lantira buaina a chhuah avanga mobile internet service tihtawp chu boruakin ziaawm lam a pan zel avangin nimin zing dar 9 aṭang khan tihnun a ni leh ṭan ta. Private telecom operator Airtel senior official chuan service titawp chhunzawm zel tura thupek an dawn tawh loh avangin, mobile internet service chu tihnun a ni ta tih a sawi.
Gauhati High Court chuan Ningani tlai dar 5 aṭang khan service hi tinung turin hriattir mah se, state sorkar chuan nimin zing aṭang khan a tihnun tir ta chauh a ni.
BJP MLA 12-ten CM hmu
Assam-a BJP MLA 12-te chuan Ningani khan chief minister Sarbananda Sonowal chu hmuin, CAA vanga an state-in buaina a hmachhawn mek chinfel sak thuai tura prime minister Narendra Modi nawr turin an ngen.
MLA-te chuan Chief Minister hnenah CAA vanga state mipuite rilruah hlauhthawnna lo awm chungchangte tihreh sak an nih theih nan, state sorkarin Assamese culture leh ṭawngte humhalh tlat a tum dante mipuite hnenah hrilhfiah turin an ngen bawk.
Dibrugarh bial BJP MLA Prasanta Phukan chuan, "Assam mipuite hlauthawng takin an awm a, BJP MLA te ngei pawh hlauthawng takin kan awm phah a ni. Nawrh huaihawt a nih aṭangin ni riat chhung chu kan in pawh kan chhuahsan ngam lo a ni," a ti.
BJP MLA-te chuan CAA chu an party policy a nih avangin an dodal ve ngawt thei lo tih sawiin, mahse Assam mipuite humhalhna tur kawng dang a awm tel a ngai a ni, an ti. Sootea bial MLA, Padma Hazarika chuan, "CAA hi party agenda tih hre chunga BJP zawm ka nih avangin ka dodal leh ngawt thei lo a ni. Mahse party ka chhuahsan vanga he Act hi sut leh theih ni dawn ta se, party chhuahsan turin ka inpeih nghal e," tiin a sawi.
MLA rualte hian CM hnenah hian state chhunga hnam parukte hnenah tirbal status pek thuai a ṭul thute an sawi a, hei bakah hian Assamese chu state language a ni kumkhua ang tia cabinet hnenah resolution pass tir turin an nawr bawk.
Meeting zawh hnu hian chief minister office chuan nakkum January thla chhung ngeiin Moran, Motok, Chutia, Koch-Rajbongshi, Tai-Ahom leh tea tribe-te Schedule Tribe (ST) status pe tura ngenna chu state sorkarin a thehlut dawn tih a sawi. Hei bakah hian district pali huam chhunga Ahom, Chutia, Moran leh Motok hnamte tan eizawnna kawng kawhhmuh nan te, infrastructure tihhmasawnna atan, an hnam rohlu humhalhna leh thil dang pawimawh dang atan cheng vaibelchhe 125 ṭheuh pek an ni dawn tih CM office chuan a tarlang bawk a ni.