Meghalaya Assembly-in ILP resolution pass

Meghalaya Assembly-ah Ningani khan an state tana Inner Line Permit (ILP) system hman a nih theihna tura sorkar laipui nawrna tur resolution siam chu pass a ni. 

Resolution-ah hian ILP hi Meghalaya state leh a leilung fate venhimna turin Bengal Eastern Frontier Regulations, 1873 hnuaiha hman a ni tur a ni, tih a ni. Speaker Metbah Lyngdoh chuan chief minister Conrad Sangma-a'n resolution hi a pharh hnuah vote tur chhawp chhuakin, vote laknaah House member zawng zawng chuan a thlawp lamah an vote. 

Vote lak hma hian eptu pawl, Congress chuan Citizenship Amend­ment Act (CAA), 2019 chungchang sawichhuakin, hei hian an state leh hmun dangah  nghawng a neih hrang hrangte an sawilang a, hun eng emaw chen an sawiho zui bawk. Meghalaya sorkar chuan he reso­lution kaltlang hian, sorkar laipui hnenah Bengal Eastern Frontier Regulation, 1873 preamble-a 'state of Meghalaya' tih telh a nih ve theihna tura a ṭul anga siamṭhat dan ngaihtuah turin a nawr zui dawn tih a tarlang bawk a ni. 

Chief Minister chuan Assembly in ILP resolution a pass chu Parliament-ah a thlen kher a ngai lo tih sawiin, President chuan preamble-ah hian Meghalaya chu telhin hriattirna a tichhuak mai thei a ni, a ti. Resolution an pass chu MLA 60 te duh dan mai ni loin, Meghalaya mipui nuai 33-te duhdan a ni, tiin a sawi.