Tripura : CM-in public service thuam chak turin hriattir

Tripura chief minister Manik Saha schuan state sorkar chu mipui sorkar a nih thu sawiin, department hrang hrang chu mipui harsatna sukiang tura theihtawp chhuah turin leh, traffic system leh dan leh thupek kenkawh kawngah hma la turin a hriattir.

Chief Minister chuan he thu hi Secretariat-a public welfare project hmasawn dan review meeting a kaihhruai zawhah a sawi. Mahakaran Conference Hall No. 2-a Task Monitoring System (TMS) meeting buatsaihah hian state-a district 8-a District Magistrate leh Police Superintendent-te chu virtual-in an tel a ni. Review meeting-ah hian CM Saha chuan state-a traffic system leh dan leh thupek kenkawh kawnga hmalak nasat a ṭul thu a sawi.

State khawpui Agartala pawh telin, district headquarters hrang hranga lirthei tam lutuk chingfel tura hmalak thuai a ṭul thu sawiin, lirthei bungrua rit tak tak phurte dik zawka enkawl a nih theihnan leh, traffic electronic signal-te chu engtik lai pawha hman a nih theihna turin thuneitute a hriattir. Hei bakah transport official-te chu state-ah lirthei stand thar siam hna rang taka zo turin a hriattir a ni.

State chu ruihhlo awm lohna hmuna siam turin police-te chu rel kaltlanga ruihhlo tawlhruk a awm leh awm loh ngun taka thlithlai turin CM Saha chuan a chah bawk. Security leh a kaihhnawih thuneitute chu nursing home, rehabilitation home leh sub-registry office-te chu eirukna laka an fihlimna tur leh dik leh rintlak taka hna an thawh theihna turin khauh taka endik fo turin a hriattir. Hei bakah Dhalai district-a public health leh zirna system tichangtlung turin District Magistrate leh health official-te a chah bawk.

Chief Minister chuan infrastructure hmasawnna sawilangin, kawng siamṭhat mekte chu quality ṭha taka a rang lama zo fel turin thupek a tichhuak bawk. Electric service chungchangah department official-te chuan tun hnaia Kalbaisaskhi-a thli tlehin a tihchhiat chu 99% siamṭhat a ni tawh tih an hrilh.