Manipur : CM-in venhimna dinhmun ennawn

Manipur chief minister Yumnam Khemchand Singh chuan, May 7-a Kamjong district-a khaw tam tak helpawlin an hal bakah an beih hnuah BSF official-te nen state-a dan leh thupek dinhmun an ennawn. Meeting hi he inbeihna thleng vanga neih niin, state-a venhimna dinhmun tihchak a nih theihna turin sawi hona hlawkthlak tak an nei tih CM Singh chuan a sawi.

Inbeihna hi Ningani zinga thleng a ni a; Kamjong district-a Naga, Namlee, Wanglee leh Choro khuate chu ralthuam keng helpawlin an bei nia sawi a ni. Mipuite chuan chenna in eng emaw zat hal a nih thu sawiin, khaw mipuiah hlauhthawnna nasa tak a thlen tih an tarlang. Namlee-a chenna in pahnih leh Wanglee-a chenna in pali chu luah chhunzawm tlak lohin a kangral a, Choro-a chenna in zawng zawng deuh thaw chu tihchhiat a nih thu leh, biak-in chiah suasam a ni lo tih an sawi bawk.

L. Keishing chuan he pawikhawihna hi international ramri hmun hrang hranga Myanmar helpawl leh, Kuki National Army (Burma) leh People's Defence Force (PDF) te tih a nih a rin thu a sawi.

He thil thleng hi CM Singh chuan pawmzam theih a ni lo tih sawilangin, buaina chhuak chu uluk takin a thlithlai bakah, security force-te chu hetianga inbeihna a thlen tawh lohna turin theihtawpa hma la turin a hriattir thu a sawi bawk. State sorkar chuan remna leh muanna a awm theihna turin hma a la zel dawn tih a sawi bawk.