Assam : Mihring taksa peng hralh ruknaa inhnamhnawih pali man

Assam-a Dibrugarh leh Tinsukia police ṭangkawp chuan Ningani khan Margherita leh Dibrugarh-ah mihring taksa peng hralh ruknaa inhnamhnawih mi pali an man. An mi mante hi Zakir Hussain (53), Shankar Chentanu (28), Samir Pal (37) leh Gopal Roy (31) te an ni. Samir Pal leh Gopal Roy-te hi Dibrugarh-a cheng an ni a, Zakir Hussain leh Shankar Chentanu-te chu Margherita-a Veneer Mill huam chhunga an cheng an ni.

Police-te chuan an mi mante hian kum 35 mi, Rajib Dey, Margherita khaw mi chu sum leh eizawnna pek an tiam hnuah a kal hralh tura an tihluih thu an sawi. Assam hmun hrang hrangah dan loa mihring taksa peng hralh rukna network a awm tih sawi a nih avangin police-te chuan chhuizuina hi zau zawkin an nei chhunzawm dawn a ni.

Margherita police station-ah thubuai theh luh niin, chhuizuina neih a ni ang. Police-te chuan damdawi-in, medical lama hnathawkte leh doctor-te pawh dan loa mihring taksa peng hralh ruknaah hian an inhnamhnawih em tih an chhui dawn bawk. Kal (kidney) hralh rukna network chu upper Assam-a tea garden huam chhungah a hluar hle tih sawi a ni a, chhungkaw khawsak harsate bitum an nih fo thu sawi a ni bawk.