Meghalaya : New Shillong water project senso tur siam ṭha

Meghalaya sorkar chuan New Shillong Township Water Supply Scheme-a sum senso tura ruahman, Rs vbc 538.44 chu Rs vbc 772.96-ah siamṭhat a ni tih an puang. Official thuchhuahah sum senso tur siamṭhat chu 43.55% in pung. He project hmang hian New Shillong Township, Mawkhanu Knowledge City leh a chhehvela khaw 32-ah tui supply pek tum a ni.

Sum senso tur tihpun a nih chhan hi Nonghali khuaa tuikhuah siamna tur bulah landfill site siam tura rawtna a awm avangin a siamna hmun dangah sawn a ngaih dawn vang a ni. Engineering design-ah thlak danglam tur tam tak a awm vang tih an sawi. Hei bakah tualchhung Dorbar Shnong-te hnena customary rama pipeline an siam avangin compensation pek a ngai dawn bawk.

Sum sen belhna turah hian power supply system pawh telin, hei hi original detailed project report-ah telh a ni lo. Official-te chuan tui supply ṭha taka pek chhuah a nih theihnan independent power infrastructure a pawimawh tih an sawi. Sum senna tur dang zingah kawng siamṭhat pawh telin, chung zingah chuan Jaroit leh Diengpasoh khuaa PWD kawng km 1.5 a thuiah pipe phumna tur laih a ngaih vang a ni.