Assam-in zirtirtu hna ruak hnawhkhah tum
Assam education department chuan kumin August thlaah teaching leh non-teaching staff post ruak tam zawk chu hnawhkhah hman a tum.
State education minister Himanta Biswa Sarma chuan thla ruk chhungin elementary teacher regular post 15,000 hnawhkhah tum a ni, a ti. Hei bakah hian post ruak dang 6000 pawh a tahtawlin lak tum a ni bawk.
Education department chuan elementary level-a school 4993 leh secondary level-a school 626-te bakah college thar 30-te chu provincialise a tum bawk a ni.
Minister chuan school management committee-te hnenah kumin April thlaa zirlaite hnena a thlawna school uniform semna turin cheng vaibelchhe 450 pek a ni dawn tih a sawi. Hei bakah hian elementary school infrastructure tihchangtlunna turin cheng vaibelchhe 962 pek a ni dawn bawk tih a sawi.
Education department hian thla ruk chhungin college-ah science stream hawn belh te, tea garden area-ah high school 100 din leh, high school-te higher secondary-a upgrade a tum a ni. He hmalakna hi zirtirtu nuai khat leh zirlai nuai 60 velin an chhawr theih dawn nia sawiin, minister chuan hemi atan hian sorkar chuan kum khatah cheng vaibelchhe 3,000 vel a seng dawn tih a sawi bawk.