Assam: Chief Minister atan Himanta Biswa Sarma la lut

Assam chief minister term hnihna chelhna turin Himanta Biswa Sarma chu Guwahati-a Khanapara Veterinary College Field-ah nimin khan lak luh a ni. He hunah hian prime minister Narendra Modi, union home minister Amit Shah, defense minister Rajnath Singh leh BJP national president Nitin Nabin bakah, NDA chief minister-te leh deputy chief minister-te an tel.

Governor Lakshman Prasad Acharya chuan Sarma hi rinawmna thutiam a laktir a ni. BJP hian Assam Legislative Assembly inthlanah seat 126-ah seat 82 lain, an thawhpui Asom Gana Parishad (AGP) leh Bodoland People’s Front (BPF) te chuan seat 10 ve ve an la bawk a, a vaiin seat 102 an la a ni. Sarma hi Jalukbari bialah in candidate-in, vote 89,000 chuangin a chak. Sarma bakah BJP hruaitu Rameswar Teli, Atul Bora, Charan Boro leh Ajanta Neog-te chu cabinet tharah hian minister atan lak luh an ni bawk.

BJP hruaitu hlun leh MLA Ranjit Dass chu Assam Legislative Assembly-ah speaker atan ruat a ni. Sorkar thar lakna ralmuang leh hlawhtling taka neih a nih theihna turin central leh state security force-te chuan Guwahati pumah venhimna ngawrh takin an kalpui a ni. Sorkar thar cabinet meeting pawh neih thuai a ni dawn a, inthlan hunlaia an thutiam leh hmasawnna tura an agenda siamte tihhlawhtlin chu an ngaih pawimawh ber a ni.