Sikkim : Indian Army-in all-women cafe hawng

Hmeichhiate chawikanna leh ramria tourism tihhmasawnna turin, Indian Army chuan East Sikkim-a khualzinten an tlawh nasat hmun, Baba Harbhajan Singh Memorial temple bula feet 13,000 vela sangah hmeichhe hlangin an enkawl, all-women-run café an hawng. Café hi Army hnuaia Ranbhoomi Darshan hmalaknain hawn a ni.

Guwahati-a Defence Public Relations Officice chuan, project chu Trishakti Corps-in civil administration leh tualchhuang stakeholder-te an thawhpuinaa an din a ni tih thuchhuah an siamah an tarlang. Facility enkawl tur hian tualchhung hmeichhiate ruat an ni. Official-te chuan he hmalakna hi tourism chawikanna leh hmeichhiate sum lak luhna tur siamsakna a nih thu an sawi. Hei bakah Baba Harbhajan Singh temple tlawhtute tana chawlh hahdamna hmun changtlung zawk buatsaihna a ni bawk.

Indian army chuan café chu ramri huam chhunga hmeichhiate khawsak chawikanna a nih rualin, East Sikkim-a tourism ngelnghet awm theihna tura duan a nih thu an sawi. He hmalakna hi ramri district-a sipaite leh civil thuneitute thawh hona huang zauhna niin, he programme hi sipaiten mitin huap hmasawnna thlen a, hmarchhak bial ramri hmun hrang hranga tualchhung mipui nena thawh hona tihchakna tura duan a ni tih official-te chuan an sawi. Tualchhung mi, a bikin hmeichhiate tan hna thawh tur a siamsak dawn bawk a ni.