Arunachal : Samak ki Rs vbc 1.2 man hu kawltu pali man

Arunachal Pradesh-a Papum Pare district-ah samak ki nia rinhlelh, Rs vbc 1.2 man hu kawltu mi pali chu police-ten an man. Police-te chuan an thudawn bawhzuiin, May 12 khan Hollongi leh a chhehvelah wildlife trafficking kaihhnawiha beihpui thlak hna an kalpui a ni.

Papum Pare police superintendent Taru Gusar chuan beihpui an thlaknaah hian samak ki pakhat chu hmuh chhuah a nih thu a sawi. Chhuizuina an neihah he samak ki kawltu pali an mante chuan samak ki hi Rs vbc 1.2 a hmun danga tawlhruk an tum thu an sawi a ni. Police-te chuan Balijan Police Station-ah thubuai ziak lutin, trafficking network nen interstate leh international-ah inzawmna an neih leh neih loh an chhuizui nghal ang.

State home minister Mama Natung chuan Balijan police-te leh forest department-te thawh dunna chu fakin, ram ngawa nungchate humhalh leh, pawikhawihtute laka hremna pek kawnga sorkar inpekna tilangtu a ni, a ti. A social media X-a thuchhuah a siamah, wildlife trafficking chu chenna leilung leh ramsateah nghawng ṭha lo thlentu a nih thu leh, hetianga pawikhawihtute chu man chhuah a, na taka hrem an ni zel dawn tih a tarlang.

Wildlife conservation pawl, World Wide Fund for Nature leh International Union for Conservation of Nature chuan South Asia pumah samak pel leh an chenna hmun nasa taka tihchhiat a ni tih an lo sawi fo tawh a ni.