Assam : Cabinet-in Uniform Civil Code (UCC) pawm

Assam-a Himanta Biswa Sarma-a'n chief minister term hnihna a chelh hnua cabinet meeting hmasa berah, Uniform Civil Code (UCC) pawm a ni. Chief Minister chuan May 26 hian Assembly-ah bill pharh a nih tur thu puangin, May 21-ah assembly session neih ṭan a ni ang. Sarma chuan state-a UCC hman tura rawtna chu tribal community venhimna leh hnam ziarang leh sakhua humhalhna tur a nih thu a sawi.

Assam-a tlang leh phaia tribal awm zawng zawngte chu UCC thuneihna hian a huam dawn lo thung. Sakhaw thil tih dan, nunphung leh ziarang hrang hrangte pawh telh a ni lo ang. He ruahmanna siamah hian nupa innei thei chin kum bithliah, inneihna leh inṭhenna registration, nupui pakhat aia tam neih tihtawp, hmeichhiaten ro an khawm theihna chanvo leh live-in relationship kaihhnawiha dan siamte a tel tih Chief Minister chuan a tarlang.

Assam-a UCC hman tura ruahman hi Uttarakhand, Goa leh Gujarat-a an hman ang ni loin, leilung fate leh tribal community-te venhimna tura tih a nih thu cabinet chuan a sawi. BJP-in state tana inthlan dawna manifesto a siam chu kum nga ro an rel chhungin kaihruaitu atan an hmang dawn tih an tarlang bawk.

Cabinet meeting-ah hian Chief Secretary kaihhruainain kum nga chhung state-ah hnathawh tur nuai hnih siam turin task force din a ni bawk ang. Cabinet chuan sorkar tharin thla ruk chhung lirthei lei lo turin thutlukna an siam a, sorkar official-te chu damdawi lama inenkawl a ṭul vang a nih loh chuan ram pawna zin khap a ni bawk. Sorkar fund hnuaia offline seminar leh workshop buatsaih ṭhin pawh thla ruk chhung buatsaih a ni dawn lo a ni.