Tripura : AGMC & GBP Hospital tan Rs vbc 28 pawm

Tripura-a Agartala Government Medical College (AGMC)-a Rogi Kalyan Samiti (RKS) leh, GBP Hospital chuan Thawhlehni khan damdawi-in hall-ah meeting neiin, healthcare hmasawnna atana hmalakna an neihte sawi ho a nih bakah financial year lo awm tur atana budget pawh pawm a ni.

Meeting hi RKS chairperson leh MLA Mina Rani Sarkar chuan kaihruaiin, health secretary Kiran Gitte, Health Services director Dr. Debashree Debbarma, AGMC principal Dr. Tapan Majumder leh Medical Superintendent leh Department head Dr. Bidhan Goswami bakah councillor-te leh committee member dang an tel.

Meeting-ah hian RKS chuan kum 2026-27 financial year atan Rs vbc 28 chu pawmin, Rogi Kalyan Samiti hnuaia contract-a hnathawkte hlawh 3% a tihpun a nih tur thu a sawi. Budget pawm hi medical hmanrua changkang zawk leina atan hman a ni dawn a, diagnostic service thuam chak bakah damdawi-ina damlo enkawl dan tihchangtlunna atan hman a ni ang. Committee chuan damloten welfare scheme an hman mek chu harsatna awm loin an hman chhunzawm thei dawn tih an sawi bawk.