Arunachal : Cabinet-in ILP system khauh zawka kalpui a pawm

Arunachal Pradesh chief minister Pema Khandu kaihhruaia state cabinet meeting neih chuan Inner-Line Permit (ILP) system khauh zawka kalpuina tur a pawm. He thutlukna hi May 14 Ningani zinga Scheduled Tribe Bachao Andolan Committee-in darkar 36 chhung shutdown an puan hnuah siam a ni. Shutdown hian Assam ramri hmun eng emaw zat bakah, state khawpui Itanagar leh Naharlagun-ahte nunphung a nghawng buai hle.

Bengal Eastern Frontier Regulation 1873 hnuaia ILP tihchhuah hi India miten Arunachal Pradesh-a an zin veivah theihna tura siam a ni. Khawtlang pawl hrang hrang leh zirlai pawlte chuan state sorkar chu document lem venna tura hma la turin an nawr a, state cabinet chuan ILP kalpui dan dinhmun thlirletin, khauh zawka kalpuina chu a pawm ta a ni. System siamṭhat ah hian sorkar chuan permit lem tihtawpna atan check gate-ah QR code verification digital e-ILP platform a siam dawn a ni.

Sorkar chuan ILP dan bawhchhiate chu na taka hrem an ni dawn tih puangin, hremna an puan zingah dan bawhchhiate chu kum hnih chhung lung in tan tir theih a nih thu an sawi. District task force leh police officer-te chuan dan loa an state-a lut an awm leh awm leh enfiahin entry gate, market leh hnathawhna hmun an endik ṭhin dawn bawk.