Assam : Congress hruaitu Banashree Gogoi-i'n banna theh lut

Assam-a Congress hruaitu hlun leh All India Mahila Congress national secretary, Banashree Gogoi chuan Indian National Congress-a post a chelh zawng zawng aṭangin banna a theh lut. Nimina banna lehkha Congress president Mallikarjun Kharge hnena a thehluhah, Gogoi chuan party-a a nihna chelh zawng zawng bakah, Indian National Congress-a Primary Membership a nihna aṭang pawha a ban thu a ziak.

Gogoi hi All India Mahila Congress national secretary ni lai a ni a, party-a nihna pawimawh tak tak chelhtir a lo ni tawh vanga a lawmthu pawh lehkhaah hian a sawilang a ni. Assam mipui leh ram leh hnam tan theihtawp a chhuah chhunzawm zel dawn thu sawiin, a banna chu a rang lama pawmsak turin a ngen nghal bawk.

Congress party hi Assam assembly inthlan neih zawh takah a che chhe hle a, seat 19 chauh lain, Assam inthlana a chet chhiat ber ṭum a ni. Inthlan neih hma lawk khan Assam Congress president hlui, Bhupen Kumar Borah chuan BJP a lo zawm tawh bawk a, BJP ticket-in Bihpuria bialah thlan tlin a ni.