Meghalaya : CM-in review meeting kaihruai

Meghalaya chief Minister Conrad K Sangma chuan May 14 khan Social Welfare department leh Meghalaya police-te nena review meeting neiin, state-a DREAM hnuaia anti-drug campaign kalpui thlirletna an neih bakah, Jal Jeevan Mission project hmasawn dan leh Tura Medical College hman ṭan theih hun turte an sawi ho.

Meeting-ah hian CM Sangma chuan rehabilitation facility thuam chak leh, department hrang hrang thawh honaa ruihhlo do beihpui thlak kawnga nasa lehzuala hma lak a pawimawh thu a sawi. Sangma chuan sorkarin rehabilitation infrastructure thuam ṭhat a tum thu leh, thawh hona ṭha tak hmanga ruihhlo do beihpui thlak turin hma an la mek tih sawiin, khawtlang, institution leh tualchhung hruaitute hnenah nasa zawka awareness buatsaih a ni dawn tih a tarlang.

CM chuan an hmalaknate tihlawhtling turin department leh community hrang hranga mipui nen thawh hona ṭha neih a ṭul tih a sawi Sangma chuan state puma Jal Jeevan Mission project kalpui mek hmasawn dan pawh thlirletin, hmalakna ngelnghet, sum lama ruahmanna felfai leh village-level infrastructure leh hunrei tak daih tura hna thawh a pawimawh tih a tarlang. Sangma chuan project chu a hun taka zawhfel a nih chuan mitinin tui supply rintlak an dawng thuai dawn a ni, a ti.

Sangma chuan review meeting dang a neihah, Tura Medical College sak mek dinhmun pawh thlirin, a hun taka sak zawh a nih theihna tur leh hawn hun tur an sawi ho.