Meghalaya : Ruihhlo Rs vbc 135 chuang man hu man tawh

Meghalaya chief minister Conrad K Sangma kaihhruaia tun hnaia DREAM Mission hnuaia ruihhlo do beihpui thlakna leh, hmalakna chungchanga review meeting neihah kum 2023-2026 inkarah ruihhlo Rs vbc 135 chuang man hu man a ni tawh tih an tarlang. Ruihhlo tawlhruknaa inhnamhnawih leh a zuartu mi 700 chuang man an ni tawh bawk.

Record tarlan danin, ruihhlo do beihpui kalpuina hnuaiah thubuai 415 ziah luh tawh a ni a, mi 738 man an ni tawh bawk. Ruihhlo an mante chu heroin kg 30, ganja kg 7325.97, yaba tablet kn 22, crystal meth kg 24.377-te an ni. Thuneitute chuan psychotropic substance kg 14.4 leh codeine, khuh damdawi bottle 96,231 man a ni tawh tih an tarlang.

Meeting-ah hian rehabilitation facility dinhmun pawh thlirin, DREAM hnuaia district hrang hranga centre hman mek leh a thar sak tura ruahmanna awmte sawi ho a ni. Rehabilitation centre dinna tura rawtna awm pawh zirchian mek a ni.

Official-te chuan rehabilitation center dinna tur design template leh hnathawh ṭan a nih hun tur ngaihtuah mek a nih thu an sawi. DREAM hnuaia rehabilitation service-te chu state sorkar leh civil society pawlte nena thawh hona hmanga kalpui a ni tih tarlan a ni bawk. Meeting-ah hian DREAM hnuaia Information, Education and Communication (IEC) hmalakna kaltlanga ruihhlo laka fihlim tur leh awareness buatsaih a pawimawh tih sawi ho a ni.