Manipur sorkarin thubuai ziak lut

India lak aṭanga inlakhran duhtute, Yamben Biren leh Narengbam Samarjit-ten London-a Manipur sorkar hran, government in exile an din chungchangah nimin khan Manipur sorkar chuan thubuai a ziak lut a, thil awmdan a chhui zui nghal dawn bawk. 

Thawhlehni khan Biren leh Samarjit hian London-ah Manipur government in exile, Manipur State Council tih bawk chu an din a, social media lamah pawh an thehdarh nasa  hle. Sorkar dintute hian Manipur lal, Leishemba Sanajaoba pawhin a thlawp tih an sawi a, mahse lal chuan hei hi a pha thung. 

Manipur police-te chuan chief minister N Biren Singh thupek angin nimin khan Imphal West district-a Lamphel Police Station-ah FIR an ziaklut. CM Singh chuan Narembam Samarjit lakah hian IPC section 121, 123, 124 (a), 505 (b) leh 102 (b) hnuaiah thubuai ziahluh a nih thu a sawi a, Yambem Biren lakah eng ang thubuai nge ziahluh tih erawh a sawilang lo. Samarjit hi Salai Holding Private Ltd., dintu a ni. 

Chief Minister chuan Biren leh Samarjit-ten Manipur sorkar din a nih thu an sawi chu, India laka indo an puanna angah state sorkar chuan a ngai tih a sawi. Sorkar hran dinna kawnga inhnamhnawihte chu chhui chiangin, kar khat chhungin an hming pawh puanzar vek a nih tur thu a sawi bawk.

Rampawna Manipur sorkar din chungchang hi Manipur police-ten an chhui a, state sorkar chuan a ṭul dan a zirin National Investigation Agency hnenah pawh hlan a ni maithei tih a sawi.