Meghalaya : Northeast infra summit buatsaih dawn

Meghalaya chuan kumin June 11 leh 12 hian North East India Infrastructure Summit and Exhibition (NEIINFRA) a buatsaih dawn a, he hunah hian policymaker, investor, financial institution leh industry hruaitute chuan hmarchhak biala infrastructure huang zauh, inkalpawhna leh investment tih theihna tur an sawi ho dawn a ni. Summit-ah hian transport network, khawpui infrastructure, digital connectivity leh investment lama thawh hona turte chu ngaih pawimawh beisei a ni.

Chief minister Conrad K Sangma chuan Shillong-ah summit neih a nih tur hi puangin, state economy chu kum nga liam ta aṭang khan a let hnihin a pun tawh bakah, capital investment pawh kum 2018 aṭangin a let liin a pung tawh tih a sawi. Sangma chuan kum thum aṭanga kum li liam ta chhungin state economy ṭhanlenna ngelnghet a awm tawh thu leh, ramchhunga economy ṭhang chak ber zinga mi an nih thu a sawi. State sorkarin industrial promotion policy a kalpui pawh sawilangin, private investment hipna tur incentive lian tham a pe chhuak tih a sawi bawk.

CM chuan state-a entrepreneurship leh technology sector ṭhanlenna tarlangin, startup ecosystem chak tak din a ni tawh a ni, a ti. State-a IT park hmasa ber hawn a nih tawh bakah, park pahnihna siam tura ngenna awm pawhin ram chhung leh ram pawna company-te ngaihven a hlawh hle tih a tarlang. North Eastern Region-a Ministry of Development secretary, Sanjay Jaju chuan hmarchhak biala infrastructure ṭhanlenna leh hmasawnna turin sorkar laipuiin a pui chhunzawm zel dawn tih a sawi ve bawk a ni.