NEIGRIHMS buaina chhui chiang dawn

North Eastern Indira Gandhi Regional Institute of Health and Medical Science (NEIGRIHMS) director leh Cardiology Department-a Head of Department (HoD) inkara buaina awm chungchang chu chhui chiang turin union health ministry chuan thupek a tichhuak. 

Ministry chuan buaina chhui tur hian institute-ah inquiry committee a din a, state sorkar pawhin  hemi chungchanga hriattirna hi Nilaini khan a dawng tawh bawk. NEIGRIHMS director leh Cardiology HoD chhui hna hi union health ministry hnuaia vigilance division in a thawk dawn a ni. 

Meghalaya health and family welfare minister AL Hek chuan NEIGRIHMS buaina neih mek chu chhui chian ngei a ṭul tih sawiin, sorkar laipui hmalakna chu lawmawm a tih thu a sawi. Hemi rual hian he thil hian damdawi-ina damlo enkawlte chu a nghawng buai loh an duh tih a sawi nghal bawk. 

CM Conrad Sangma pawhin NEIGRIHMS buaina neih mekah chuan thil dik lo taka tih a awm em tih chhui chian a ṭul thu a lo sawi tawh a ni. NEIGRIHMS director kalchhuak, DM Thappa chuan tunhnaiah Cardiology department leh Sanjo Medical chu pace maker, stent leh hmanraw dang leina kawngah an thawkdun nia sawiin, institute-ah chuan mafia an awm ni hialin a lo sawi tawh a ni. October 14 khan institute-a governing council chuan Thappa hi a post aṭang hian a chawlhtir nghal  bawk. 

Kumin kumtir lam khan director leh Cardiology department HoD chu stent leh hmanraw dang supply chungchangah na takin an lo inbei dun tawh bawk a ni.