Arunachal : ASTBAC-in ni 7 chhung sorkar hun pe

Arunachal Scheduled Tribes Bachao Andolan Committee (ASTBAC) chuan Pathianni khan state sorkar chu Inner Line Permit (ILP) system chak leh rintlak zawka kalpui an phutna tihlawhtling turin ni sarih hun an pe a, hun pek chhunga an thil phut tihhlawhtlin a nih loh chuan state pumah darkar 72 bandh huaihawt an tum tih an sawi.

ASTBAC chairman Sol Dodum chuan sorkarin an thil phut an ti hlawhtling lo a nih chuan lungawi lohna lantir ngei an tum tih sawiin, state pumah shutdown puan a ni dawn a ni, a ti. Committee chuan ILP system hman lai mek chuan state leilung fate a humhim zawh loh bakah, state pawn aṭangin dan loa pem lut an pung zel tih an sawi. An thil phut zingah state-a Tibetan raltlante verified record emaw 'family tree' documentation an phut bawk.

ASTBAC general secretary, Millo Ambo chuan sorkarin ILP thlak danglamna tur a siam chu sawiselin, temporary ILP siam phalna chuan thil ṭha lo tak a thlen thei tih a sawi. ILP hman sual theihna laka venhimna khauh zawka kalpui a ṭul thu a sawi bawk. Committee chu Thawhṭannia home minister Mama Natung-a'n meeting a kohah pawh tel duh loin, Chief Minister nen inbiakna nei tur erawh chuan an inhawng tih an sawi.