Kuki-ten Delhi-ah kawng zawh

Delhi leh NCR-a cheng Kuki hnam chuan Naga Autonomous Council din tura rawtnaah, Kuki ram an rin tel nia sawi a nih avangin duh lohna lantirin Ningani khan Delhi-ah kawng an zawh. 

Kuki Students Organisa­tion, Delhi chuan thuchhuah siamin, Kuki mipui leh pawl hrang hrangte chuan Naga Autonomous Council-a Kuki ram telh chu an pawm thei lo tih sawiin, lungrual takin resolution an pass a ni, a ti. Hemi rual hian Naga Autonomous Council din hma hian Kukiland Territorial Council din hmasa turin a phut bawk. 

KSO chuan Naga helpawl leh sorkar laipuiin inbiakna an neih meka Naga Autonomous Council atana rawtna an siam­ah hian Manipur-a district pariat - Chandel, Tengnoupal, Senapati, Kangpokpi, Tam­englong, Noney, Ukhrul leh Kamjong te huam tel tir a ni tih a sawi. Heng district-te hi Naga ram bik ni loin, hmanlai aṭanga Kuki leh Naga te lo chenna a ni, a ti. 

Sorkar laipui hnenah pawh Kuki armed group, KNO & UPF te inbiakna a neihpui mekah, Kukiland Territorial Council siam tura inremna siampui turin an phut bawk tih KSO chuan a tarlang bawk. Hemi chungchanga memorandum an siam chu prime minister Narendra Modi hnenah thehluh a ni.