Assam : Water metro service kalpuina tur zingah Guwahati tel

Sorkar laipuiin ram chhunga Water Metro service thawh khatna a kalpui tur zingah Guwahati a tel tih ports, shipping and waterways union minister, Sarbananda Sonowal chuan Thawhṭannia high-level review meeting neih zawhah a puang. Ministry of Ports, Shipping and Waterways (MoPSW) chuan urban water-based public transport system kalpui dan tura hmalakna zingah, minister-te inrawnkhawmna atan Draft National Water Metro Policy, 2026 a tichhuak bawk.

Water metro service kalpuina tur zingah hian Guwahati bakah Srinagar, Patna, Varanasi, Ayodhya leh Prayagraj-te pawh an tel. Assam-ah hian Tezpur leh Dibrugarh chu project thawh hnihna kalpui tur zingah an tel a ni. He hmalakna hi Kochi-a Water Metro project hlawhtling tak siam a nih hnuah, sorkar laipui chuan ram chhung hmun hrang hrangah water-based urban mobility system huang zauh a tum a, he ruahmanna hi khawpui chhunga lirthei tlan tam lutuk tihtlemna tur a ni.

Meeting-a thu a sawiah, Sarbananda Sonowal chuan Water Metro system-te chuan civil infrastructure awmsa an hman avangin investment tlem zawka thawh a ni dawn tih a sawi. Project-te pawh sak zawh thuai a ni dawn a, ram lei ngai a tihtlem dawn bakah, electric leh hybrid ferry hmangin senso tihtlem chuan hlawkna a thlen dawn tih a sawi. He hmalakna hian khaw chhung tawt lutuk a ti ziazawm dawn a, veivakte tan a hahdamthlak zawk dawn a ni, a ti. Ministry chuan Water Metro system hmang hian mipui leh khualzinte veivahna a ti awlsam dawn tih an tarlang bawk.

Ministry chuan project kalpuina tur hmun 18 tlawh a nih tawh thu tarlangin, draft feasibility report 17 theh luh a ni tawh tih an sawi. Feasibility report zingah Srinagar, Patna, Guwahati, Varanasi leh Ayodhya-te chu pawm an ni tawh bawk a ni.