Manipur : Naga pawlin Thadou pastor 3 thattua puhna an hnawl

United Naga Council (UNC) chuan, Manipur-a Thadou kohhran hruaitu pathum thattua Naga pawl hrang hrang an puhna chu hnawlin, he pawikhawihnaah hian Kuki helpawl nia rinhlelhte chu an inhnamhnawih an rin thu an tarlang.

May 18-a thuchhuah an siamah, UNC chuan May 13-a kohhran hruaitu pathum thah an ni chu na taka an dem thu leh, he pawikhawihnaa inhnamhnawihte zawn chhuah kawngah an pawl chuan theihtawp an chhuah dawn tih an tarlang. Council chuan he thil thlen hnu lawkah hian Naga-te an inhnamhnawih nia puhna social media-ah hmuh tur a awm tih sawiin, an puhna hi finfiahna mumal awm lo a nih thu an sawi.

UNC chuan security force leh army-te hmalak dan leh inrukbona awm pawh sawiselin, Leimakhong-a 57 Mountain Division headquarters chu he pawikhawihna thlenna bulhnaiah a awm thu leh, hemi ni vek hian khauh zawka hmalakna an nei lo tih an tarlang. Naga-te chen tamna hmunah venhimna a ṭhat tawk loh thu leh, sorkar laipui leh state sorkar chu helpawlte man a camp-a dah turin an ngen bawk. An pawl chuan mipuite chu finfiahna mumal nei loin thudik lo thehdarh lo turin an ngen bawk a ni.