Nagaland : AI platform 'Eliona' tlangzarh

Nagaland sorkar chuan May 21 khan Nagaland State Disaster Management Authority (NSDMA) hnuaia siam, AI-native Climate and Disaster Intelligence Supercomputing Platform, 'Eliona' a tlangzarh. State-a khuarel chhiatna thleng thei laka inbuatsaihna, sik leh sa inthlak danglam laka invenna leh technology hmanga state inrelbawlna tihchak kawngah a pui thei dawn nia sawi a ni.

Platform hi Disaster Management and Atmospheric Research (NaCDAR)-a Nagaland Centre-ah NSDMA and New & Renewable Energy advisor Z. Nyusietho Nyuthe chuan a tlangzarh. NSDMA joint chief executive officer Dr Johnny Ruangmei chuan 'Eliona' chu AI-accelerated high-performance infrastructure anga duan a nih thu leh, sik leh sa lama hriat zauna, khuarel chhiatna lam zirchianna leh chhiatna thleng thei laka invenna tur atana duan a nih thu a sawi.

'Eliona' hian atmospheric science, remote sensing, big data analytic leh geospatial intelligence hmangin sik leh sa dinhmun, chhiatna thleng tur laka inbuatsaihna bakah chenna leilung hriat zauna kawngah a pui dawn a ni. Nyuthe chuan Nagaland chu ruahtui tlak nasat na, leimin leh tuilian tuar nasa ṭhin an ni tih sawiin, he platform hian chhiatna thleng thei lakah rang zawkin hriat lawk theihna a pe dawn a ni, a ti.