Assam : Prelims exam-a tlingte sum lama puihna pe dawn

All Assam Students' Union (AASU) chuan Assam-a UPSC-a ti ṭhate tan special financial assistance scheme puangin, Civil Services Preliminary Exam-a candidate 25 te chu Rs 50,000 ṭheuh pek an ni dawn tih an sawi. He thu hi AASU president Utpal Sarma chuan nimin Pathianni khan a puang. UPSC Civil Services Preliminary Exam hi ram chhung hmun hrang hrang neih a ni dawn a ni.

Utpal Sarma chuan exam hmachhawn tur candidate zawng zawngte chu duhsakna sang ber hlanin, an hmalakna chuan state-a zirlaite civil service exam-a hlawhtlinna an chan theihna tura puitu leh phurna petu a nih a beisei tih a tarlang. Sum lama puihna chuan candidate hlawhtlingte mains exam atana an inbuatsaihna kawngah a pui dawn tih sawiin, coaching institute, test series leh mock interview session-ah te an tel theih phah dawn a ni, a ti.

Zirlai tam tak chu prelims an paltlang hnuah inkaihhruaina changtlung leh training ṭha pek an ni a, he an hmalakna hmang hian civil service lama candidate ti ṭhate chawikan tum a ni, a ti bawk. He hmalakna hi special project 'Pratyahwan' hnuaia kalpui a ni. AASU chuan zirlai thiam thei leh taimaten national level-a hlawhtlinna an neih theihna turin an pui chhunzawm zel dawn tih Sarma chuan a sawi. An hmalakna hlawhtling taka kalpui a nih theihna turin mipuite thawhpuina a ngen nghal bawk a ni.