Tripura: BJP MLA-in kar khatah ni li hna thawh rawt

Tripura Legislative Assembly-a BJP chief whip leh MLA, Kalyani Roy chuan May 22 khan state sorkar hnenah sorkar hnathawkte tan kar khata ni li hna thawh leh office hun chhung pawhsei rawtna a thlen. Roy chuan West Asia-a buaina chhuak avanga prime minister Narendra Modi-a'n fuel renchem a ṭul thu a puan hnuah he rawtna hi a siam a ni.

Press conference-a thu a sawiah, Roy chuan state sorkar hnuaia hnathawk Group C leh Group D zinga 50% chuan office an kai tih sawiin, staff dang zawng chuan May 14 aṭang khan in lam aṭangin hna an thawk tawh tih a tarlang. Fuel renchemna atan mipui vantlang thawh ho a pawimawh thu leh, buainain engtia rei nge a awh dawn tih a hriat a ni lo tih a sawi. Roy chuan Chief Minister, cabinet minister-te leh MLA-te pawhin veivahnaa an lirthei hman an titlem tawh tih a sawi bawk.

Roy chuan mipuite chu hmun hla vak loa veivahna atan public transport, e-rickshaw emaw bicycle hmang tam turin a ngen. State-a digital infrastructure chungchang sawilangin, Tripura chuan civil secretariat level aṭanga gram panchayat thlengin e-office system kalpui a nih tawh thu a sawi a, mahse he thil hi ṭha taka kalpui a nih theihna atan Group C leh D hnathawkte chu an pawimawh chhunzawm zel a ni, a ti. Hetiang thil a nih avang hian sorkar hnathawkte tan kar khata ni li hna thawh bakah an hnathawh hun chhung darkar riat chu darkar kuaa pawtsei turin state sorkar a ngen a ni.