Delhi-ah NE festival nei dawn

Hmarchhak state  hrang hrangte chanchin phochhuahna tur leh, tourism leh entrepreneuship lam chawilarna turin November 8 aṭang hian ni thum awh tur, North East Festival (NEF) vawi sarihna chu New Delhi-ah neih a ni dawn. 

Festival hi Indira Gandhi National Centre for Arts-ah buatsaih a ni ang. 

Organiser-in-chief Shyamkanu Mahanta chuan, North East Festival hi hmarchhak bialte chanchin pholan leh a la hre ngai lote hrilh hriatna tur a ni tih sawiin, hmarchhak state hrang hrangte inpumkhatna siamna tur a ni, a ti. 

Festival chhung hian art work­shop leh exhibition te buatsaih a ni dawn a, hmarchhak bialte chaw chi hrang hrang, thei leh thlaite phochhuahna food festival pawh buatsaih tel a ni dawn bawk. Hmar­chhak state hrang hrangte thil siam, handloom and handicraft product pho lanna turin dawr 100 siam a ni bawk ang. 

Northeast tourism chungchang­ah business-to-business (B2B) meet neih tel a ni dawn a, textile lam bikah buyer-seller meet pawh siam tel a ni ang. Hei bakah hian hmarchhak biala sumdawnna kaihhnawih thilah seminar te buatsaih tel a ni dawn bawk a ni.