Tribal dikna chanvo humhim turin ILP department din a ni dawn : Arunachal CM

Arunachal Pradesh chief minister, Pema Khandu chuan state sorkarin Inner Line Permit (ILP) system department hran a din dawn tih puangin, he hmalakna hi state-a ILP kalpui dan thuam chakna tur leh, state chhunga tribal-te dikna chanvo humhimna tur a nih thu a sawi.

He thu hi zirlai pawl, community-based organisations (CBOs), political party leh dan lama mi thiamte bakah civil society group-te nena state leilung fate dikna chanvo leh ILP kalpui dan chungchanga darkar sarih chhung consultative meeting an neihah puan a ni. He thutlukna hi state hma hun leh leilung fate tana siam niin, CM Khandu chuan state-a tribal mipuite nihna leh an dikna chanvo humhim chu ngaih pawimawh a ni tih a tarlang.

Meeting-ah hian Arunachal Pradesh ST Bachao Andolan Committee (APSTBAC)-in an thil phut sawi hona neih niin, an sawi ho zingah tualchhunga tribal-te dikna chanvo nasa zawka humhalh, dan loa state-a pem lutte laka hma lak, ILP system khauh taka kalpui leh non-tribal community-te hnena Scheduled Tribe status pek dodalnate a tel. Khandu chuan heng an thil phut palite hi sorkarin a ti puitling dawn tih a sawi.

Hei bakah dan loa sakhuana hmun sak a nih chungchangah Chief Minister chuan state-a dan loa mosque awmte lakah sorkarin hma a lak tur thu leh, hmalak chhunzawm zel a nih theihna turin report kimchang siam turin Chief Secretary hriattir a ni tawh tih a sawi bawk.