Manipur : CM-in Makhan relief camp tlawh

Manipur chief minister Yumnam Khemchand Singh chuan May 28 khan Makhan khuaa relief camp tlawhin, helai hmuna khawsa tualchhung buaina avanga chenna in leh lo chhuahsan, internally displaced persons (IDPs) te nen inbiakna an neih bakah, puihbawmna pek an nih dan a endik. Chief Minister hi Deputy Chief Minister leh MLA-ten an ṭawiawm a ni.

Relief camp tlawh a nih chhan hi buaina thlen chhunzawm zel vang leh, insawn chhuah kawnga harsatna a awm vang niin, he buaina hian Makhan, Kanto Sabal, Imphal leh Kanglatongbi-te pawh a nghawng a ni. CM Khemchand Singh chuan IDP-te chu state sorkarin an insawn chhuahna leh inbengbelna tur a buaipui zel dawn thu a sawi.

Relief camp-a chengte chuan helai huam chhunga tun hnaia buaina chhuak vanga inrukbona a thleng chu pawi an tih thu an sawi. CM Singh chuan he inrukbonaa inhnamhnawihte chu na taka hrem an ni dawn tih relief camp-a chengte chu hrilhin, helai hmuna chengte puihbawmna leh an nitin mamawh pek an ni dawn tih a sawi bawk. Helai huam chhungah hian buaina chhuak vangin harsatna hrang hrang an tawk mek a, May 13 khan helpawlte chuan Leilon Vaiphei khua aṭangin mi 18 an rubo a ni. Hemi kaihhnawihah hian state chhung hmun hrang hrangah lungawi lohna lantir a ni bawk. State sorkar chuan boruak muanawm a awm theihna turin venhimna kawngah hma lak chhunzawm zel a nih dawn thu leh, IDP chhungkuate theihtawpa puih an ni dawn tih an tarlang.