Tripura : Governor-in Digital Forest Rights Act (FRA) tlangzarh

Tripura governor N Indrasena Reddy chuan May 28 khan, hmarchhak biala a hmasa ber atan Digital Forest Rights Act (FRA) leh tribal Development Atlas chu 'Janjatiya Garima Utsav 2026 - Birsa Lives in New Bharat Week' hawnnaah tlangzarhin, tribal-te dikna chanvo humhimna atan scientific ruahmanna leh technology hman a ni dawn tih a sawi.

He thil hi Ministry of Tribal Affairs-in FRA kalphung digital hmanga kalpui tura ram pum huapa hmalakna a neih mek peng pakhat a ni. Hmalakna kal zelah ministry chuan Smart India Hackathon 2025-ah harsatna an tawhte thlenin, AI hmanga FRA Atlas leh WebGIS decision-support system siam a, Individual Forest Rights, Community Rights leh Community Forest Resource rights-te endikna neih a ngen a ni.

Tripura Space Application Centre puihnaa siam digital FRA Atlas hi mimal leh khawtlanga ramngaw dikna chanvo leh enkawlna tihchakna tura ruahman a ni. Tlangzarhnaah hian Tribal Welfare Department chuan FRA Atlas booklet a tichhuak bawk. Zalenna sualtu Birsa Munda-a'n tribal-te dikna chanvo, ramngaw leh nihna chungchanga a ngaihdan chu kum zabi 21-naah pawh a la pawimawh reng tih a tarlang.

Tribal welfare minister Bikash Debbarma chuan, department-in hmun leh tlawhpawh harsaa cheng mipuite tan welfare, zirna leh thiamna tihhmasawn a ngaih pawimawh thu a sawi. Programme-a official tel zingah Tribal Welfare Department Secretary, Governor Secretary leh department director-te an tel.