Assam : Motok zirlai pawlin lungawi lohna lantir

Assam-a Tinsukia district-a zirlai pawl pahnih- Sadou Asom Motok Yuva Chatra Parishad leh, Sadou Asom Motok Chatra Sanstha-te chuan nimin June 1 khan Tinsukia-a Thana Chariali-ah lungawi lohna an lantir a, district-in harsatna hrang hrang an tawh mekah rang taka hma la turin sorkar an ngen.

Zirlai pawl pahnih aiawhte chuan chief minister Himanta Biswa Sarma hnenah Tinsukia District Commissioner kaltlangin memorandun an theh lut a, an thil phut zingah petrol, diesel, LPG cylinder leh nitin mamawh man sang chho zel tihhniam pawh a tel a, hei hian mipuiah harsatna leh phurrit nasa tak a thlen tih an tarlang. Hei bakah Tinsukia district hmun hrang hranga kawng siamṭhat hna a rang lama thawh an phut thu sawiin, kawng chhia chuan veivakte tan harsatna a thlen bakah, hmasawnna a ti ṭhuanawp tih an sawi.

An thil phut dang lehah zirlai pawl chuan, Motok khawtlanga historical monument leh heritage site bakah helai biala hnam ziarang humhalh an phut. Tinsukia Medical College and Hospital-a healthcare service tih chak, doctor dah belh leh medical infractructure thuam chak bakah healthcare facility pawimawh dah an phut bawk. Ruihhlo hluar zel venna atan ruihhlo tawlhru ṭhin network-te laka hremna na tak pek leh, ruihhlo hmansual kawnga ṭhalaite venhimna chak zawka kalpui an phut bawk a ni.

Memorandum-ah hian vantlang infrastructure nghawng pawi thei dan loa luahte tihtawp an phut a, district-a hun rei tak chhung hmasawnna project thawh tur tihkhawtlai tawh chinfel an phut bawk. Pawl pahnih hruaitute chuan state sorkar leh district thuneitute chu mipui hamṭhatna atan a rang lama hmalak sak turin an ngen.