Tripura : Solar MW 200 power plant din dawn

Power and Housing and Urban Affairs union minister, Manohar Lal Khattar chuan Pathianni khan Tripura chuan solar energy siam chhuah kawngah theihna nasa tak a nei tih sawiin, MW 200 solar power project din a nih dawn thu leh tender pawh buaipui mek a ni tih a sawi.

State khawpui Agartala-a Tripura State Guest House-a review meeting neih zawha press conference-a thu a sawiah, Khattar chuan hydropower generation chu state-ah din theih a nih loh thu a sawi rualin, solar energy siam chhuah kawngah erawh state chuan theihna nasa tak a nei tih a sawi. Minister chuan Power and Urban Development sector hnuaiah he project hi thawh a ni dawn tih a sawi. Hei bakah kawtthlera sumdawngte tan central government scheme hnuaiah loan 9,300 chuang sanction a nih thu leh, sum chu thawh thuma sem chhuah a ni dawn tih a tarlang.

Khawpui infrastructure chungchang pawh sawilangin, bawlhhlawh sawngbawlna tura hmalakna zingah DC Nagar-a bawlhhlawh paihna hmuna hnathawh tur pawh ennawn a ni a, project atan Rs vbc 100 dah a ni tih a sawi. Chenna ina bawlhhlawh lakkhawm hna pawh self-help group (SHG) member-ten an thawk tih sawiin, bawlhhlawh sawngbawl kawnga hmalaknate thlawp ṭha turin mipui a ngen.

Union Minister chuan sewage treatment plants (STPs) thar 11 puangin, kumin December-ah thawh ṭan a ni dawn tih a sawi. Khawpui thianghlimna tihhmasawn kawngah khaw pali- Agartala, Udaipur, Dharmanagar leh Melaghar-ah faina kaihhnawih project atan Rs vbc 27 sanction a ni tih a sawi bawk.