Manipur Cabinet-in District thar pasarih din remti

Manipur state cabinet secretariat thuchhuah chuan district thar pasarih din belh a nih tur thu a puang.

Chief Minister O Ibobi Singh-a kaihhruai cabinet meeting chuan district thar pasarih din belh a remti a ni. Tun dinhmunah Manipur-ah hian district pakua - Imphal West, Imphal East, Bishnupur, Thoubal, Ukhrul, Sena-pati, Tamenglong, Churachand-pur leh Chandela district-te a awm mek. A thar pasarih din belh a nih chuan district 16 a awm dawn a ni. CM O Ibobi Singh chuan, hmasawnna hna chak zawka kalpui a nih theihna turin district thar din belh a ni dawn a, dodalna awm ṭhin mah se sorkar chuan a tih tur a ti zel ang, a ti. Cabinet meeting chuan district thar din chu lungrual takin a pawm a, a takin hmasawnna hna thawh mek zel a ni, a ti.

CM chuan district-a hlankai tura cabinet-in a pawm tawh te chu official-a puan thuai a ni dawn tih sawiin, Election Commission of India-in Manipur assembly election neih hun tur a puan hma ngeiin district thar hi puan a ni ang, a ti. State sorkar hmalakna dodal zawnga hma la lo tur leh, hmasawnna ti-
ṭhuan-awp zawnga sorkar kar lo turin mipuite a ngen tih a Singh chuan a sawi bawk. Hetih lai hian United Naga Council (UNC)-te chuan sorkarin Sadar Hills leh Jiribam-te district-a hlankai an nih theih nana a hmalakna dodalin November 1 aṭang khan National Highway an dangchat. UNC-te nawrh huaihawt avang leh, nasa taka dodalna a awm avangin Sadar Hills chu district-a hlankai tura a pawm zingah telh a ni lo.

Hetih lai hian security convoy-te chu Manipur-Nagaland border-a Mao Gate pana an kal laiin, Inrinni khan khan mipuite chuan lo dangin let leh turin mipuiten an ngen. Security-te hi lirthei veng tura thawkchhuak an ni a, Manipur police, CRPF leh IRB-te an ni. Mipuite chu aurinna hmanga inko khawmin, security force-te chu let leh turin an ti a, National Highway an dang chat nghal. Mipui pungkhawm leh venhim hna thawk tura kalte hi hun rei vak lo chhung an innawr buai a, buaina lian tham chhuak erawh a awm lo.

Manipur Cabinet meeting-in district-a hlankai tura a pawmte chu - Kangpokpi, Tengnoupal, Pherzawl, Noney, Kamjong, Jiribam leh Kakching te an ni. Hengte hi district puitlinga hlankai an nih hunah an mahni pual ṭheuhin Deputy Commissioners (DCs) leh Superintendents of Police (SPs)-te dah nghal a nih tur thu sorkar thuchhuah chuan a tarlang bawk.