Assam Police-te'n Pawisa thleng tum mi pathum man

Assam police-te chuan pawisa thleng thubuaiah Zirtawpni khan mi pathum an man.

Police-te chuan an mi mante kut aṭang hian pawisa note thar Rs 2,000 note hlir, cheng nuai 20 an man tih an sawi. Heng pawisa te hi pawisa thi, Rs 500 leh Rs 1,000 note nen thleng tura ruahman a nih thu sawiin, police-te chuan an nangching ta tih an sawi. Heng mite hi Guwahati-ah man an ni a, hel nen inzawmna an nei em tih an chhui mek a ni. Assam police-te chuan tun hnaiah pawisa note thi cheng nuai 26 chuang an man tawh tih an sawi a, mipuite chu fimkhur tur leh, bank account midang hman tir lo turin an chah.

He tih lai hian Indian Army leh Assam Police-te chuan kar kalta Inrinni khan Kokrajhar district-ah hel dapchhuah beihpui an thlak a, National Demo-cratic Front of Bodoland (NDFB-S) mi leh sa pahnih an kaphlum. NDFB(S) kut aṭang hian AK 47, pistol leh silaimu ṭhahnem tak man a ni. Security force-te chuan a hma pawhin Kokrajhar district-ah hian beihpui an lo thlak tawh a, NDFB(S) mi leh sa eng emaw zat an lo man tawh a ni.