AP CM-in Vodafone 4G tlangzarh

Arunachal Pradesh Chief Minister Pema Khandu chuan kar kalta Zirtawpni khan Dree Ground-ah Vodafone 4G a tlangzarh.

CM Khandu chuan, tunlai khawvelah internet chu hmasawnna atana thil pawimawh berte zinga mi a nih thu sawiin, eirukna leh sum chheprelh venna kawngah ṭangkai taka hman theih a ni a ti. Eirukna te, hel pawlte sum chheprelh veng tur chuan cashless policy kalpui a ngaih thu leh, a taka tihlawhtling tur chuan internet chu kawng engkima pawimawh a nih thu leh, Prime Minister Narendra Modi-a lo suangtuah ṭhin tih hlawhtlinna a ni, a ti. Modi-a kaihhruai sorkar laipui chuan kum 2017 chhungin, Arunachal-a gram panchayat zawng zawngah internet a thlen theihna turin hma a la dawn tih Khandu-a chuan a sawi.

Arunachal CM chuan Vodaphone-in hmarchhaka 4G a bun hmasak berna an ni thei chu lawmawm a tih thu sawiin, an hmalakna chu a fakawm hle a ni, a ti. Vodafone 4G tlangzarhna hun hi Home Minister Kumar Waii, Minister Rajesh Tacho, Jomde Kena, Hunchun Ngandam, Tamiyo Taga, Parliamentary Secretary Pani Taram bakah, Vodaphone India Operation Director, Arvind Vohra leh Vodaphone Northeast CEO Alok Verma-te'n an telpui a ni.