District thar din hi inṭhen- darh tumna a ni : UNC

United Naga Council (UNC)-te chuan, Manipur Chief Minister Okram Ibobi Singh-a kaihhruai cabinet meeting-in district thar pasarih dinbelh tura thutlukna a siam chustate mipuite zah lohna leh ṭhendarh tumna a ni, an ti.

UNC thuchhuah chuan, district thar dinbelh chu hliam awmsa belhchhahna mai a ni, tiin an pawm lo tih an sawi. State sorkar chu Naga mipuite zah lo ah puhin, an lungawi loh thu an sawi. Naga-te chuan engti kawng zawng mahin an ram chhuhsak an remti dawn lo a, nasa taka an do zel tur thu an sawi. Naga pawl hrang hrangte hian nimin khan Senapati-ah consultation meet an nei a, an hmalak zel dan tur an rel rin a ni.

November 1 aṭang khan UNC hian Manipur chakkhai lamna kawngpui pawimawh NH pahnih an dang chat a, tun thlengin an la titawp lo. NH bakah hian Trans Asian railways siam hna thawh mek chu an titawp a, Naga-te chenna biala national project reng reng tihtawp an rel bawk. Stae sorkar chu Sadar Hills chungchanga Memorandum Of Understanding (MOU) a lo ziah tawh zah tura an phut thu te, December 14, 1981-a Manipur sorkar leh All Naga Students’ Association, Manipur(ANSAM)-te'n inremna an lo ziah tawh te, November 10, 1992-a Naga Students’ Federation(NSF) leh sorkar inremna siam te, September 27, 1996-a state sorkar leh United Naga Council(UNC)-te'n inremna an lo ziah tawh leh, ANSAM, Manipur sorkar leh ministry of home affairs(MHA)-te'n, November 24, 2011-a remna thuthlung an lo ziah tawh te chu palzut lo tura an duh thu an sawi.

CM Ibobi Singh-a kaihhruai sorkarin bill pathum - Protection of Manipur People Bill, 2015, Manipur Land Revenue and Land Reforms (Seventh Amendment) Bill, 2015 leh Manipur Shops and Establishments (Second Amendment) Bill, 2015 a pass chu an dem thu an sawi a, state mipuite ṭhendarh tumna a ni, a ti. Tun hnaia cabinet meeting-in Kangpokpi, Tengnoupal, Pherzawl, Noney, Kamjong, Jiribam leh Kakching te district-a hlangkai tura thutlukna a siam leh ta te chu United Naga Council (UNC)-te chuan an hrethiam lo tak zet tih an sawi.