Manipur CM-in Hmalakna a nei lo : Union Minister

Union HRD Minister Pra-kash Javadekar chuan hun rei tak chhung National Highway dan chah a nih chungchangah, Manipur Chief Minister Ibobi Singh chuan hmalakna a nei lo niin a sawi.

Union Minister hian ni hnih chamin Manipur a tlawh a, Inrinni khan Imphal-ah thuthar thehdarh tute kawmin, Manipur state assembly elec-tion neih tur atana BJP party hmalakna hrang hrangte a tarlang a ni. Javadekar chuan, Ibobi Singh-a kaihhruai Cong-ress sorkar chuan 'divide and rule' policy a kalpui mek nia sawiin, state mipuite leh sorkar inkara inhriatthiam lohna awm chhanah Congress party a puh. Hun rei tak chhung United Naga Council (UNC)-te'n National Highway an dang chat chu pawi a tih thu sawiin, state sorkar chu mipuite harsatna sukiang tur leh, kawngpui dan titawp tura hma la loah a puh.

Javadekar chuan chuan Congress sorkar chu sum chelek leh hmachhuanah puhin, chu chuan nasa takin mipuiteah helna a chawkchuak a ni, a ti. Buaina chu sum hmanga chinfel theih a ni lo tih sawiin, mipuite tawrhna nasa tak chinfel chu ngaih pawimawh hmasak ber a ngai a ni, a ti. BJP chuan sorkarna an siam a nih chuan, ṭhalai tam tak tan hna an siam sak thei dawn tih sawiin, zirna leh mipuite hmasawnna chu an ngaih pawimawh hmasak tur a nih thu a sawi.

Union HRD Minster Java-dekar chuan, Manipur-in state assembly election a hmachhawn turah BJP chuan hnehna an chang ngei dawn tih sawiin, Manipur mipuite chuan sorkar thar an hmu thuai dawn a ni, a ti. Congress kaihhruai sorkar chuan Manipur chu state hnufual leh, hmasawn lo berah a chan tir mek nia sawiin, kum 15 zet rorel tawh Congress sorkar hnawl ngam turin mipuite a sawm. Union Minister chuan Election Commission-in election schedule a tihchhuah hunah BJP chuan an candidate turte hming an puang dawn tih a sawi bawk.